De zittinge die weej as VG De Törvers organisere koste geld, vuuël geld. In ut verleeje waas ut ophaole van ald pepeer de innigste brón van inkómste. Nog steeds vormp ut ophaole van ald pepeer de grutste brón van inkómste veur ós gezelschap. Maar zoeëas ózze penningefoekser det waal ens gezag haet, is ut veur de toekóms hendig as weej waat ekstra spek op de rubbe hebbe. Daorum is d’r ein spónsorkemissie in ut laeve gerope. Ut belangrièkste is dan ouk det dees kemissie geld binne perbeert te haole veur de vereiniging.

Eine gas jaor geleeje zien weej zutjes aan gestart um waat bedriève in de perochie te benadere mit de vraog of zeej waat mièr woele beteikene veur De Törvers. De ièrste bedriève hebbe zich toen spóntaan gemeld en eur logo kreeg dan ouk ein plaetske op ós breefpepeer. Ut logo van ein paar bedriève vónd zien  plaats op de ald pepeerkelender dae in de perochie idder jaor hoès aan hoès wuurt verspreid. Ut begin waas gemak. De mónd-op-mónd reklame deej de res.

Al vreej snel hadde weej ós breefpepeer vol staon mit spónsore en kóste weej gaon dinke aan ein oètbreiding van de spónsoraktiviteite. Ein moeëj spónsorbord in de gank van De Windmeule, ós rissidensie, waas de volgende stap. Ein ander bedinksel vanoèt de P&P-kemmissie waas ut idee um ein entreebukske te make in plaats van  entreekaarte. Ouk in dit bukske waas dan weer plaats um bedriève te laote advertere. De rissultate heejvan kint geej idder jaor zeen beej de kaartverkoup veur de zittinge.

Ein andere aktiviteit betref de Vrinde van De Törvers. Vuuël minse in de perochie veule zich éin mit De Törvers. Det hebbe weej as vereiniging al hièl waat kière meuge óndervinde. Dees minse zien allemaol Vrind van De Törvers gewaore. De Vrinde drage ós ein werm hert toe en as dank kriège dees minse van ós as Törvers idder jaor ein schoeën plentje as kedootje aangebaoje.

Al mit al is de Spónsorkemissie ein kemissie  die steeds bezig is um op ein kwante meneer geld binne te haole veur de vereiniging, zoeëdet weej nog wies in lingte van daag veur óg ein  paar schoeën zittinge kinne organisere.

Leeje van de Sponsor kemissie:

Marcel Geomini

Hans Aerts

Ton van Dreumel

Wim van Riemsdijk (veurzitter)

Tom Peeters

Geert Kleeven

Alex Fassotte

Dit zien ózze sponsore

Hebbe weej mit dit stökske óg interesse gewek, neem dan kóntak op mit emus van ós bestuur of de veurzitter van de Spónsorkemissie.

Veurzitter Spónsor Kemissie

Wim van Riemsdijk