De Veurzitter

Hallo allemaol. Meug ik mich efkes veurstelle?

Miene naam is Jos Backus en ik bin sinds kort veurzitter van dit geweldig gezelschap. Wie jónk ik bin hoof ik neet te zeggen; det kint geej zoeë waal zeen! Vanaaf 1991 bin ik lid van De Törvers en dit jaor bin ik tot veurzitter beneump.Ut is geweldig um dees funksie beej zó’n gezelschap te meuge oètoefene.

Weej hebbe 43 leeje en gelökkig haet idderein vuuël veur mekaar euver en det mótte weej zeker zoeë halde! Ouk stoppe weej mit z’n alle vuuël energie in dit gezelschap um veur de boètewach zoeë good meugelik veur d’n daag te kómme.  Dao meuge weej mit z’n alle trots op zien.

In 1973 is V.G. de Törvers gebaore en opgerich en det beteikent dus det weej in 2006 ós 33-jäörig bestaon viere. Ein speciale kemissie is in ut laeve gerope um alles róndum dees festiviteit te organisere en ik kin óg verzekere: d’r wuurt flink aan gewerk um d’r waat hièl moeëjs van te make! Waat neteurlik neet wilt zegge det weej tot 2006 gen leuke aktiviteite mièr hebbe. Nae, nae, weej gaon door zoeëas geej det van ós gewind ziet.

V.G. De Törvers

Waas geteikend

Jos Backus, Veurzitter

De Sikkertaris

Miene naam is Geert Meerts. Ik bin vanaaf 2000 lid van VG de Törvers.

Ein geweldige vereiniging. Naodet ik in 2007 de Hoeëgheid bin gewaes, kwaam der een vreje plaats binne ut bestuur. Ik heb mich heejveur aangemeld. Mien take ware ut regele van de raod en ut samestelle van ut ald-pepeer schema. Twieë erg belangrieke activiteite. Ik heb dit met jaore met vuul plezeer gedaon. Wim van Riemsdijk geit dees take euvernaeme.

In 2012 heb ik Frits Seelen opgevolg binne ut bestuur as de nieje sikkertaris. Ein super oetdaging.

Ik bin der gruuëts op um de sikkertaris te meuge zien van dees vereiniging.

De Penningmeister

Miene naam is Tom Peeters en ik meug mich sinds 2011 de penningmeister van dees schoeën vereiniging neume. Op ut moment det ik dit stökske op pepeer zet, bin ik behalve bestuurslid ouk de benjamin van De Törvers. Daorum is ut veur mich ein ièr um gekaoze te zien as penningefoekser. Sinds 2008 bin ik lid van De Törvers, maar ik volg de vereiniging al sinds mien 11e, as zoon van de adjudant, via publiek in de zaal tot de tapper van de pilskes veur de hière.

Penningmeister, waat duit dae persoeën noow persiès? Simpel: hae zörg det de vereiniging finansjeel gezónd is en blief. Klink mekkelik, is ut neet. Dao kump eine houp beej kièke. Begruuëtinge dene opgesteld en goodgekeurd te waere, raekeninge dene betaald te waere, artieste mótte eur gage kriège, kemissies mótte geld hebbe um eur take oèt te kinne veure en d’r mót ouk geld binne kómme waat de penningmeister in de gate mót halde. En det meistal allemaol tegelièk.

En as det allemaol is gebeurd, volg op de leejevergadering ut belangrièkste. Naodet de kaskontrólekemissie de stökke nauwkeurig haet naogekeke, prissenteert de penningmeister ut aafgeloupe finansjele jaor veur ein kritisch publiek: de euverige leeje van De Törvers. En as dan alles in orde is, dan begint ut weer van veur aaf aan. Iets wao ik mich mit vuuël plezeer veur inzet um te zörge det ut De Törvers good geit en blief gaon.

Tom

De Bestuursleeje

 Miene naam is Bart Daemen.

Sinds april 2005 maak ik deil oèt van ut bestuur van V.G. De Törvers. Ik bin vanaaf 1997 lid van V.G. De Törvers en heb de vereiniging neet allein lière kinne as ein groeëte ‘femilie’ mit vuuël lol en plezeer, gezelligheid en vrindschap, maar ouk as ein ‘femilie’ die  veur mekaar klaor steit in ‘leef en leid’.

Dit zeen ik as de sterke krach van V.G. De Törvers en weit det vurrige bestuurders altièd gewaak hebbe det dit ouk zoeë blief.

Veur mich waas dus al direk duùtelik wie me mich vroog of ik zitting woeël neme in ut bestuur det ik det ‘erfgood’ good mei mót bewake en oètbouwe, zoeëdet weej det vaerder kinne bringe nao de volgende generasie en det die net wie weej ouk kinne zegge ‘ik bin gruuëts det ik ‘nne Törver bin!’

Ut bestuur besteit oët :

Jos Backus (veurzitter )

Geert Meerts

 (sikkertaris)

Tom Peeters (penningmeister)

Bart Daemen 

(bestuurs lid)

Wim van Riemsdijk

(bestuurs lid)