De Heilig Hartperochie haet altièd bekind gestaon um zien aktief vereinigingslaeve. Zeker in de jaore zestig en zevetig. Georganiseerde jeugvereiniginge zoeëas de Sint Joris- en Sint Christoffel verkennersgroepe, de Sint Joris gidsegroep en de vreeje jeugklup zörgde naeve andere vereiniginge veur vuuël aktiviteite in de Heilig Hartperochie. Um alles mit name veur de jeugvereiniginge in gooje bane te leie, woort d’r eine perochiële jeugraod in ut laeve gerope, dae coördinerend, stimulerend en óndersteunend aktief waas. Naeve baovestaonde werkzaamhede beschouwde deze raod ut ouk as zien taak um waat truuk te doon veur d’n inzet van de leiding.

Zoeë woort d’r jaorliks ein Vastelaovesbal georganiseerd det gratis toegankelik waas veur idderein dae zich bezig heel mit begeleiding van de jeug binne de perochie. Aanvankelik waas d’r veur dit bal, det opgeluùsterd woort door life mezièk van ónder andere ut orkes  Victor Elvie, groeëte belangstelling. Maar de belangstelling noom dusdanig aaf, det ut financiëel neet mièr verantwoord waas um dit bal te organisere. Ut bestuur van de perochiële jeugraod besloot toen um ein dreejtal minse oèt eur midde aan te wièze die de opdrach krege um veur alle aktieve perochiane einen aovend te organisere, in welke vorm dan ouk. Dit dreejtal kwaam nao inkele waeke mit ut veurstel um eine zittingsaovend te organisere mit ein Raod van Elf dae gevormp meus waere oèt leeje van diverse vereiniginge. In dit veurstel leet dus ut begin van waat noow bekind steit as V.G. De Törvers.

Aan Grad Bertrams, Vastelaovesvierder in hert en niere en bekind as jurylid van Limburgse buutwedstrijde, woort gevraog um d’n aovend te organisere. Leeje van verschillende vereiniginge woorte gevraog um lid van de Raod van Elf te waere. Dit gezelschap is rónd te taofel gaon zitte en haet, dankzij de relasies van Grad Bertrams, de ièrste zitting georganiseerd. Heej prissenteerde Vors Wiel Aerts de Raod van Elf compleet mit Sirremoniemeister aan eine volle zaal. Ouk woort d’n ièrste Prins geïnstalleerd en waal Prins Grad d’n ièrste (Grad Bertrams). Hae prissenteerde zich same mit zien twieë Adjudante, Mariet Hendrickx en Leen Aerts, aan ut publiek. D’r waas op dezen aovend nog eine primeur te belaeve. De bewoeëners rónd de Heilig Hartkerk krege veur dees daag de naam van ‘De Törvers’. Ièrs woort d’r gezóch nao eine naam wao meule in veur kwaam, maar umdet dit in Venlo al zoeëdök gebroek woort, koos me veur de aanwezigheid van de Törfstraot en veur de relasie met ut törve van ut aantal konsumpsies op ut beerviltje.

Eine Raod van Elf mit Prins en Adjudantes waas noow ein feit, maar vaerder had dit gezelschap niks. In gelieënde mantels en mit gelieënde mutse en vere en mit eine boerekiel aan, stónde zeej op de buun. Zelfs de bel van de Sirremomiemeister waas gelieënd van de lieëgere schoeël.

 Aevel, ut begin waas gemak en de organisasie veur ut jaor daonao woort door De Törvers metein opgepak.  Zoeë hebbe de Törvers wies 1976 ónder de vlag van de perochiële jeugraod dees zitting georganiseerd. Maar de Törvers woele mièr en zeej woele de Vastelaovesfestiviteite in de perochie vaerder oètbouwe. Dit waas echter neet d’n opzet van de perochiële jeugraod en daorum woort beslaote um de koppeling los te laote en De Törvers zelfstandig  te laote waere.

De kónsekwensie veur ut publiek waas waal det d’r entree betaald meus gaon waere. Zoeë woort d’r veur de ièrste zitting einen entree van ƒ 3,50 gevraog. De leeje ginge noow ouk kontribusie betale, maar óndanks dees inkómste waas ut vanwaege de toenemende koste ónmeugelik um de begruuëting rónd te kriège. Pas naodet woort beslaote um ald pepeer op te gaon haole, woorte de financiële meugelikhede waat rumer, maar ut bleef noeëdzakelik um op de kleintjes te lette.

De ièrste belangrièke stap waas gezatte, maar d’r meus nog ut ein en ander gebeure. De volgende stap waas toen ut aanschaffe van eige kleier veur de leeje, en waal ein muts en jacket. Veural ut jacket waas ein bizóndere happening. Per toeval óntvinge De Törvers ut berich det de kleierzaak Thissen oèt Tegele woort opgeheve. Dao ware ein aantal kostuums beschikbaar. Mit 20 man sterk woort de reis nao Tegele gemak um te kièke of d’r veur idderein ein geschikde maot op veurraod waas. Baove op de zölder woort gepas en gemaete. Oètintelik  waas idderein veurzeen van bóks, ves en slipjas. Koste 25 gölde, exclusief litse! Wie ut gezelschap ein jaor later ouk nog oètgerös woort mit eine gas parepluus, geschónke door de firma Verkoelen-Holla, stónde De Törvers d’r keurig op en  lete zeej zich regelmaotig beej andere gezelschappe zeen.

De meneer van werke binne de Törvers is in de loup der jaore gestructureerder gewaore. Vruùger woort alles op de maondelikse vergaderinge geregeld. Noow wuurt d’r in kemissies gewerk die eur planne aan de maondelikse vergaderinge veurlegge. Op dees meneer bliève alle leeje aktief beej ós vereiniging betrokke en is d’r ouk genóg ruumte veur ut sociale kontak tösse de leeje ónderling.

Ouk in de persenièle bezetting is d’r binne De Törvers in de aafgeloupe jaore waal waat veranderd. Wiel Aerts, ózze ièrste Vors, verhoèsde nao Blierick en besloot te stoppe beej De Törvers.  Grad Bertrams volgde um op. Mit vuuël zwier, vol humor en mit vuuël stièl waas hae de gangmaker van de zittinge. Helaas meus hae um gezóndheidsraeje nao inkele jaore ónverwachs descepter euverdrage. Huub Denessen haet dees belangrièke taak inkele jaore waorgenaome, maar wie Hans Jacobs lid woort van ós gezelschap woort hae ouk direk tot Vors beneump. Wie Hans nao ut 22 jäörig-jubileum van de Törvers aangoof te wille stoppe, is Flip Scheeres beneump tot Vors van de vereiniging. In 2007 haet Bart Daemen ut stökske van Flip euvergenaome. 

Binne de vereiniging zien d’r nog mièr mutasies gewaes. Wie veurzitter Huub Denessen aangoof te wille stoppe, is hae opgevolg door Hendrik Meerts en hae is inmiddels al weer opgevolgd door Heini Derijk en op dit moment is Jos Backus de veurzitter. De Sirremoniemeister, Drees Driessen (de köster), woort opgevolgd door Martien van Gerven en  Geer Camps. Óndertösse druùg Huub de Bruin de bel. Ein aantal belangrièke veranderinge binne de vereiniging, die allemaol intern zien opgelos. Det guf metein de groeëte krach aan van Vastelaoves Gezelschap De Törvers.

Ut leejebestand is netuurlik ouk ónderhevig gewaes aan veranderinge. Ein aantal minse van ut ièrste oor haet de vereiniging verlaote of is óndanks eure hoeëge laeftièd, al is ut waat minder aktief, nog altièd lid. Dees minse kómme dan in de 11+ Kemissie. De vreejgekómme plaatse zien ingenaome door jónge krachte die mit vuuël energie, plezeer en nieje ideeje werke aan de doelstelling van V. G. De Törvers.

Op dees meneer wille weej ouk vaerder gaon in ós wièk.