Beste surfers en minse die bewus op dees site terech zien gekómme,

Ouk V.G. De Törvers geit mit d’n tièd mei. Det bliek waal door ut bestaon van dees prachtige internetsite.

Al blaajerend kint geej kinnis make mit ós gezelschap.

Zoeë zal óg opvalle det de meiste leeje in ein of mièr kemissies zitting hebbe. Op dees meneer is idderein op ein of andere wièze aktief  bezig  binne ós gezelschap. Dit hilt automaties in det idderein invloed haet en zich betrokke veult beej ós gezelschap. Daorum ouk det d`r gespraoke wuurt van ein Törversfemilie.

Hoewaal weej gen vrouwelikke leeje hebbe, vorme de dames van ós leeje ein neet ónbelangrièk ónderdeil van ós gezelschap zoeëas det in iddere femilie ut geval is.

Ut doel waat weej ós gesteld hebbe, is ut bevordere en ut realisere van allerlei Vastelaovesaktiviteite binne de Heilig Hartperochie. In dae zin organisere weej ónder andere eine zittingsaovend mit ut oètrope van ut Prinselik Dreejspan, eine zittingsaovend veur de seniore, ut  opluustere van de zitting die door de Zónnebloom georganiseerd wuurt, ein resepsie veur ós Dreejspan en ein Vastelaovesmis.

Ik wins óg allemaol vuuël laes- en kièkplezeer.

Vors Törvius,

Vors Törvius

Bart Daemen