Spónsor Kemissie - Ein financieële óndersteuning
De zittinge die weej as VG De Törvers organisere koste geld, vuuel geld. In ‘t verleje waas ‘t ophaole van ald pepeer de insigste brón van inkómste. Nog steeds vormp ‘t ophaole van ald pepeer de groeëtste brón van inkómste veur ós gezelschap. Maar zoeëas ózze penningefoekser det waal ens gezag haet, is ‘t veur de toekóms hendig as weej waat ekstra spek op de rubbe hebbe. Daorum is d’r ein spónsorkemissie in ‘t laeve gerope. ‘t Belangrièkste is dan ouk det dees kemissie geld binne perbeert te haole veur de vereiniging.
Eine gas jaor geleeje zien weej zutjes aan gestart um waat bedrieve in de perochie te benadere mit de vraog of zeej waat mier woele beteikene veur De Törvers. De ierste bedrieve hebbe zich toen spóntaan gemeld en eur logo kreeg dan ouk ein plaetske op ós breefpepeer. ‘t Logo van ein paar bedrieve vónd zien plaats op de ald pepeerkelender dae in de perochie idder jaor hoès aan hoes wuurt verspreid. ‘t Begin waas gemak. De mónd-op-mónd reklame deej de res.
Al vreej snel hadde weej ós breefpepeer vol staon met spónsore en kóste weej gaon dinke aan ein oetbreiding van de spónsoraktiviteite. Ein moej spónsorbord in de gank van De Windmeule, ós rissidensie, waas de volgende stap. Ein ander bedinksel vanoet de P&P-kemmissie waas ‘t idee um ein entreebukske te make in plaats van entreekaarte. Ouk in dit bukske waas dan weer plaats um bedrieve te laote advertere. De rissultate heejvan kint geej idder jaor zeen beej de kaartverkoup veur de zittinge.
Ein andere aktiviteit betref de Vrinde van De Törvers. Vuuel minse in de perochie veule zich ein met De Törvers. Det hebbe weej as vereiniging al hiel waat kiere meuge óndervinde. Dees minse zien allemaol Vrind van De Törvers gewaore. De Vrinde drage ós ein werm hert toe en as dank kriege dees minse van ós as Törvers idder jaor ein schoeën plentje as kedootje aangebaoje.
Al met al is de Spónsorkemissie ein kemissie die steeds bezig is um op ein kwante meneer geld binne te haole veur de vereiniging, zoeëdet weej nog wies in lingte van daag veur óg ein paar schoeën zittinge kinne organisere.
