Pers en Propaganda Kemissie
Dees kemissie geit d’r veur um alles waat binne VG De Törvers wuurt georganiseerd nao boete toe oet te drage. Det kin op allerhande wies. Daobeej velt te dinke aan ‘t make van de poster veur de Prinse- en Zittinge en ‘t make van entreebewieze. Inmiddels is det letste oetgegreujd tot ein bookwerkske met ein prissentasie van de artieste die optraeje tiedes de zitting.
Ouk ‘t make van breefpepeer en de ald pepeerkalender behuurt tot de take van de kemissie. Op vuuel plaatse haet dae kalender al naovolging gekrege!
Beej al dees werkzaamhede is R&R – Grafische Dienstverlener ózze goje begeleider en drökker. Op mier dan veurbaeldige wies zörg dees drökkerie veur ein zier fraai rissultaat.
Vaerder verzörg de P&P-kemissie de publikasie van al ós aktiviteite in de waek- en daagblade, sociale media en regelt zeej de verkoup van de kaarte veur de Bal Unique, Plök d'n daag zitting en de Groeëte Zitting. De vergaderinge same met ós zustervereniginge waere ouk meistal bezóch door ein lid van dees kemissie, meistal same met ein bestuurslid.
Neteurlik mak de kemissie al mier dan elf jaor ein eige Vastelaovesblaad ónder de naam ‘t Törfke. Heej waere alle verhaole van ‘t meis recente jaor in opgeteikend. Ein blaad det op de niejaorsresepsie oetkump en wao idderein binne de Törversfemielie nao oetkiek. Ouk door ‘t nieje Trio wuurt ein stök geschreve.
