Veurzitter

De Veurzitter

Bas Lankreijer

Miene naam is Bas Lankreijer, getrouwd met Nancy Lankreijer-van den Nieuwenhof en gruuetse vader van Puck, Niene en Sten. Augustus 2015 makde ik kinnes met de Törvers wie toenmaolig Vors Törvius mich belde um hoeëgheid 2016 te waere. Met mien vrinde Paul en Rob, ós dames en de blage hebbe weej de Törvers vlot in ós hert geslaote. Nao ós aaftraeje waas ‘t dan ouk al vlot duudelik det weej gaer ónderdeil woele blieve van de Törversfemielie. Via de P&P kemissie heb ik ‘t DNA van dees club baeter liere kinne. Ik bin dao zier gruuets op det ik binne VG de Törvers noow de veurzittershamer meug euverneme van d’n hier Ton van Dreumel.

‘T Löp:

Eine gevleugelde oetspraok binne de Törvers. De verwachting van mich is det alles lekker zal verloupe. Det we same dees sjieke Vastelaovesverein oetdrage in ós Heilig Hart parochie, met behald van tradisies, verbinding met ‘t noow en d’n blik veuroet.

En wie ‘t ouk geit loupe:

Löp ‘t gesmeerd;
Löp ‘t vanzelf;
Löp ‘t anders;
Löp ‘t dich dun door de bóks;
Löp ‘t vas;
Löp ‘t verkierd;
Wie dan ouk ‘t löp

Ik loup heej gaer met óg same in veurop. En veur mich is ‘t ein groeëte ier um dees taak oet te meuge veure. Alles waat ik in mich heb zal perbere um ‘t gesmeerd te laote loupe.

Same met óg, want we viere neet veur niks de Vastelaovend Same. En zien we neet veur niks ein kwant en sjiek vastelaovesgezelschap VG De Törvers. Dao kinne weej gruuëts op zien.

Laot ‘t maar gaon loupe!

Waas geteikend, Ógge veurzitter,

Bas Lankreijer

Sikkertaris

De Sikkertaris

Rob Borghans

Miene naam is Rob Borghans en bin sinds 2016 lid van V.G. de Törvers. Veur mien rol as sikkertaris heb ik as veurzitter van de BBB kemissie mei meuge werke aan ’t organisere van de Benders Bizóndere Boétezitting.

In 2020 waas ik Adjudant beej Prins René I.

Tiedes de jaorvergadering van 2023 heb ik de pen meuge euverneme van Robert Kuys en de sikkertariaat funksie van ós gezelschap te gaon vervölle.

Penningmeister

De Penningmeister

Gé de Mulder

Gé de Mulder is miene naam. Sinds 2008 lid van VG De Törvers en heej binne lid van de fiets en Joekskemissie. In ’t joeksige jaor 2011 waas ik adjudant beej Prins Ton I.

Op de jaorvergadering in april 2014 bin ik door de leje van VG De Törvers verkaoze as bestuurslid van ós gezelschap. ´t Bestuur haet mich vervolges beneump as nieje penningmeister.
Al jaore langk bin ik werkzaam in de waereld van de financiële administratie en mien penningmeisterschap beej De Törvers is mien derde penningmeisterschap binne de parochie.

Ciefers in balans bringe is veur mich neet vraemp. ’t Resultaat samestelle veur de presentatie op de jaorvergadering brink ós vanzelf in balans. En det resultaat wuurt bepaold door de inkómste die weej as Törvers óntvange, zoeëas de inkómste oet ’t ophaole van óg ald pepeer en kersbuim, maar ouk inkómste van ‘Vrinde van De Törvers’ en van spónsore. Kaartverkoup veur ós zittinge, de BBB en de loeëterie die tiedes dees zitting wuurt gehalde vorme zeker ouk ein belangriek deil van ós inkómste.

Bepaolend veur ’t positieve of negatieve resultaat zien de oetgave die weej as Törvers doon. ’t Organisere van vastelaovesactiviteite kost handvol geld. Artieste, bühne, dreejspan, medalies, scepters; det zien pas vief wäörd oet ós oetgave-waordebook. Same met de euverige bestuursleje, maar ouk met de kemissie veurzitters stelle weej ein sloètende begruueting op en halde weej die in de loup van ’t seizoen good in de gate.

Bestuurslid

Bestuurslid

Rob Cuijpers

Ik bin Rob Cuijpers, in 2016 as Adjudant binne de vereiniging gekómme. In diverse kemissies, o.a. Technische kemissie en de Barkemissie draag ik mein steinke beej. In 2020 heb ik 1 jaor as sirremoniemeister mei meuge doon, um vervolges daonao as Vors Törvius gekaoze te waere.

As vors van, zit ik automatisch in ’t bestuur. Dao doon ik eigelik van alles. Veurnamelik take die direk met de Vastelaovend te make hebbe kómme op miene telder terech. Baove-al perbeer ik zoeëvuuel wie meugelik same te doon, want zoeë doon weej det met ós Törversfemilie.

Ouk perbere weej de Törverinne en neteurlik ós eige jeug, De Törfkes dao zoeë vuuel meugelik beej ós vereiniging te betrekke.

Bestuurslid

Bestuurslid

Bérke Seelen

Sinds 2023 bin ik aktief as bestuurslid in de funksie van 2de sikkertaris. Heejbeej ondersteun ik de 1ste sikkertaris, maar ouk perbeer ik de goje verbinding tösse de verschillende kemissies en alle leje te óndersteune.

As bestuurslid wil ik gaer de leje facilitere in 't geen waat zeej nuuedig hebbe um det moeëje Vastelaovesgezelschap te blieve en te kinne doon waat weej wille doon, namelik beejdrage aan de schoeëne Vastelaovend in Venlo.