Met ein schoeën pinke de Vastelaovend in
Alle vastelaovesgezelschappe doon mei aan de verkoup van d’n Opstaeker. Veur de Törvers wuurt dae verkoch beej Jumbo Kiosk Benders op 't Gelreplein.
"D’n Opstaeker" is ein initiatief van de Raod van Elf van Venloosch Vastelaoveschgezelschap Jocus wao alle andere vastelaovesvereiniginge in de gemeinte Venlo aan meidoon. ‘t Idee óntstónd aafgeloupe maart in Basel, wao ‘t bestuur van Jocus vastelaovend 2004 evalueerde. In Basel, wao de vastelaovend traditiegetrouw ein waek later velt, bliek idderein, dae vastelaovend viert, ein insigne te drage, dao Plaquette geneump. Auk in staej wie Kölle en Düsseldorp zien dergelike speldjes te koup.
De bedoeling is det alle vastelaovesvereiniginge van Groet Venlo ‘t vastelaovesinsigne gaon verkoupe. "D’n Opstaeker" kos 5 euro. De verkoup vindt plaats ónder auspiciën van de 4 stadsdeilvereiniginge, die as inisjator verantwaordelik zien veur de speld.
